Balibo (Lafaek News)—Asosiasaun Jornalista Timor-Leste (AJTL), rekomenda estadu Timor Leste no Governu AUstrália atu halo diplomásia ho estadu Indonesia hodi fo justisa ba jornalista Nain lima mate iha Balibo.
Asuntu ne’e hatoo hosi Kordenador Programa Balibo Five, Acasio Pinto iha konferénsia imprensa ba jornalista iha ámbitu komemorasaun tinan 50, jornalista Austráliu nain lima mate tanba defende lia-loos Timor Leste nian ba mundu internasional.
“AJTL aproveita realiza konferensia imprensa hodi hanoin hikas oho jornalista estranjeiru na’in lima ne’e husi Forsa Armada Indonézia (ABRI) iha loron 16 Outubru 1975, iha ne’e, iha Balibo, Komemorasaun ba tinan 50 husi omisídiu sira ne’e la’ós de’it lembransa ida, maibé marka jornalista na’in lima nia aten-barani, hodi deskobre lia-loos, liu hosi sira-nia reportajen kona-ba planu invazaun militár Indonézia nian iha Timor Leste iha tinan 1975″ hateten Acasio Pintu ba jornalista sira iha kampo Balibo vila, loron Kinta, 16/10/2025.
Acacio Pinto argumenta, Balibo Five marka importánsia jornalizmu nian ba direitus umanus, no umanidade la hó fronteira, Balibo Five hanorin povu Timor, jornalista, ativista, autoridade seguransa no polítiku sira kona-ba hateten lia-loos, defende direitus umanus no umanidade.
“Jornalista estranjeiru na’in lima, ne’ebé ikus mai hanaran Balibo Five ne’e hakbesik tebes ba Estadu no povu Timor-Leste nia fuan, tanba sira nia kontribuisaun ba nasaun ne’e nia luta ba independensia, sira sei hanoin nafatin, hosi fuan ida-idak, hosi ema timor oan sira ne’ebé deve sira nia servisu no obra jornalistika sira iha Balibo, sidade ki’ik ida iha zona fronteira Timor-Leste no Indonézia nian, Balibo Five marka importánsia jornalizmu nian ba direitus umanus, no umanidade la hó fronteira, Balibo Five hanorin ita povu Timor, jornalista, ativista, autoridade seguransa no politiku sira kona-ba hateten lia-loos, defende direitus umanus no umanidade, Sira nain lima ne’ebe hetan oho, husik hela marka no moras tanba laiha justisa ba sira iha tinan, 50 liu ba, Laiha atór ida iha kotuk no komete oho ne’e mak hetan dadur, liu-liu ofisiál militär Indonézia sira ne’ebé envolve iha sira, Komemorasaun ba tinan 50,” Acacio relata.
Nia dehan, Timor-Leste nia independénsia la kompletu bainhira laiha justisa ba familia sira neʼebé lakon sira-nia familia.
“Omisídiu Jornalista Balibo five nu’udar oportunidade ba AJTL atu husu ba Governu Austrália no Governu Timor-Leste, atu uza sira-nia meius diplomátiku hodi hakbesik-an ba Governu Indonézia, hodi husu justisa ba jornalista Balibo Five, Timor-Leste nia independénsia la kompletu bainhira laiha justisa ba familia sira neʼebé lakon sira-nia familia, Rest in Power ba jornalista Balibo Five, Greg Shackleton, Tony Stewart, Gary Cunningham, Brian Peters no Malcolm Rennie. Ita-boot sira-nia obra jornalistika no kontribuisaun sei hanoin nafatin iha Timor-Leste, nasaun ne’ebé ita-boot sira defende iha pasadu ,Ita-boot sira-nia reportajen fő inspirasaun ba jornalista timor-oan sira, atu banati tuir ita boot sira nia ain fatin, jornalizmu nian nu’udar ran-moris ba demokrasia,” Acacio Pinto hakotu.
Jornalista : Trfónio Araújo
