Lafaek News – Sekretáriu Estadu Kooperativu (SEKOOP), Arsénio Pereira da Silva husu ba komunidade liu-liu agrikultór sira atu komesa kuda Batar Bafo (BaFo) Kay Rala iha idak-idak nia fatin tanba kompaña sira komesa sosa ona.
Kestaun ne’e Sekretáriu Estadu hato’o iha serimonia asina Nota Entendementu ho Kompañia Kompradór Produtu Bafo Kayrala ne’ebé hala’o iha Salaun Gabinete SEKoop ACAIT, Dili, Segunda, (11 Maiu 2026).
“Hodi sira la bele tauk katak, dehan iha produtu ne’ebe sira uluk dehan ema la hola ona, maibe agora ema buka produtu atu hola”, dehan Sekretáriu Estadu.
Nia hatutan, ho produtu Batar Bafo Kay Rala ne’ebé mak oras ne’e komunidade sira produz sei menus tanba ne’e, Sekretáriu Estadu promete sei fasilita kooperativu sira hotu iha munisipiu atu bele kuda no produz. Alende ne’e sei organiza diresaun tekniku sira atu tun ba komunidade sira hosi fahe informasaun ba komunidade sira para sira bele iha koñesimentu.
“Agora dadaun komunidade balun tetu uluk ona, nia rejultadu hamutuk tolenada 76 mak agora dadaun iha ona, hau husu komunidade sira nafatin kuda imi nia produtu sira ho diak.” Sekretariu husu.
Iha biban ne’e, Nain kompaña, Idelfonso Pinto esplika, produtu Batar Bafo Kay Rala oras ne’e kompaña buka hela atu tetun tanba ne’e husu komunidade sira tenke kuda halo barak bainhira iha ona rejultadu mak kompaña sei ba tetu.
“Hau harakarak hateten ba komunidade munisipiu hotu-hotu nafatin halo natar, to’os hodi kuda imi nia Batar Bafo ne’e ho di’ak para bainhira iha ona rejultadu ami bele ba tetu iha imi nia munisipiu”, Idelfonso sujere.
Nia mos fo hanoin ba komunidade sira katak, lalika tauk atu kuda Batar Bafo tanba Batar Bafo ne’e di’ak tanba agora produtu ne’e tama ona iha merkadu. “Hau harakrak hateten, imi buka meius oinsa para imi bele kuda, imi nia produtu sira ne’e ho di’ak, hau agora buka Batar Bafo ne’e atu tetu tanba ne hau husu ba komunidade hotu-hotu kontinua halo to’os natar no kuidadu nafatin imi nia produtu sira ne’e”.
Nia dehan, komunidade sira hotu katak Batar Bafo liu tonelada 9 ba laten kompaña bele ba tetu. “Hau nafatin husu ba komuniade hotu, hau agora buka atu hola Batar Bafo, atu to’o tonelada hira mos hau bele tetu hotu, maibé tenke kuidadu la bele metan no la bele dodok”.
Jornalista : Rojitha da Silva/Petronila Pereira
