Lafaek News—Prezidente Autoridade Protesaun Sivil, Jesuino dos Reis de Matos Carvalho, hasoru malu ho Diretor Ezekutivu ASEAN Coordinating Centre for Humanitarian Assistance on Disastre management (AHA Centre), Lee Yam, hodi diskute apoiu formasaun iha area redusaun risku dezastre iha rai laran.
“Ita tama ona ba ASEAN entaun APC hetan konvite ba partisipa iha eventu iha ASEAN ninian hanesan observador entaun ba ne’eba ami estuda barak mekanismu, maneira sira fo atendimentu internasional ho suporta sira ne’e i partisipa iha eventu sira ne’e ami hare’e katak ita seidauk partisipa masimu, iha limitasaun barak wainhira ita tama iha ASEAN entaun molok tinan 2029 ita atu lidera ASEAN hahu agora partisipasaun ita nian tenke masimu,”Prezidente Autoridade Potesaun Sivil, Jesuino dos Reis de Matos Carvalho ba jornalista sira iha APC Caicoli Dili, kuarta-feira, 04/02/2026.
Responsabilidade sira nian hanesan asosiasaun ou organizasaun ne’ebe maka hare’e liu ba redusaun risku dezastre, prevensaun iha ASEAN entaun sira mai atu suporta mós Autoridade Protesaun Sivil Timor-Leste,liu-liu kona-ba kapasitasaun i sira hare’e durante ne’e buat barak menus iha APC nia mekanismu tamba parte ida sira hare’e armazenamentu.
“Armazenamentu ne’e la’os ita la hatene organiza maibé ita nia fasilidade mak la iha. Durante ne’e ami uza edifisiu iha munisipiu de’it mos la’os edifisiu ita nian rasik entaun tau tun tau sae iha fati-fatin sira ne’e maibé durante ne’e atendimentu ba ita nia vitima dezastre sira ami atende ho di’ak, ita nia material, ai-han ne’ebe mak ita nia governu koloka, tau hela prontu atende mesmu fatin la di’ak ne’e ita hare’e ba armazenamentu i depois kona-ba bombeirus, ita nia buska salvamentu i agora tau ona unidade espesial ba salvasaun/busca salvamentu,” Jesuino afirma
Nia subliña APC no Bombeirus seidauk iha preparasaun masimu ba atendimentu risku dezastre sira tamba sei menus kapasitasaun no ekipamentu sira.
“Ita hare’e oinsa preparasaun ne’e la’o ho di’ak, agora ita iha maibé seidauk masimu tamba baibain ita hare’e lafaek tata ema iha munisipiu sira, ita seidauk atua halo di’ak, ema mohut iha tasi laran ita hetan dala ruma mate tiha ona, dala ruma ahi han uma bombeirus ba terde, falta bee, falta ekipamentu sira. Ho situasaun sira agora ne’e presiza aumenta tan kapasitasaun, aumenta ekipamentu no buat barak entaun ami husu mai kapasita, fo formasaun ba ita nia bombeirus. Agora ita nia bombeirus rekrutamentu seidauk iha, sira agora servisu ne’e katuas hotu atu reforma ona. Tamba ne’e AHA Centre nia prezensa atu lori ita ba ASEAN ho pontidade, buat hot-hotu ita bele responde hanesan mos iha nasaun sira seluk,” Nia subliña.
Konsellu APC ne’e salienta, AHA promete ona katak sira hatene parte ne’ebe mak bele fo apoiu orsamentu no parte ne’ebe mak fo formasaun tamba ne’e apoiu uluk ami mak fo formasaun depois sei bele utiliza buat sira ne’ebe mak uza ba salvamentu buska ba mate isin No seluk tan.
“Ha’u mos rekonhese ami sira ne’e barak mak la hatene ingles entaun presiza formasaun lingua tamba agora daudauk ita enkontru iha ASEAN ne’e barak tebe-tebes. Momentu ita seidauk tama ASEAN ha’u hetan konvite barak ba hanesan observador de’it tamba ASEAN nia organiza atividade sira ne’e hodi hare’e ba redusaun risku dezastre, prevensaun i oinsa tuir ita nia moto “hotu-hotu ita proteze hanesan,” Prezidente APC salienta.
Entretantu Prezidente Autoridade Potesaun Sivil deklara, AHA Centre iha interese mai fo formasaun ba Autoridade Protesaun Sivil ne’e tamba tina-tinan Timor-Leste tau osan rihun walu nulu ($80.000) iha AHA Centre ho nune’e Timor nia partisipasaun ne’e sira obrigadu tebe-tebes, tamba molok Timor-Leste tama ASEAN, prense ona quota iha ne’eba hodi apoiu ba dezastre naturais iha ASEAN.
Jornalista: Gracia Soares / Maria Jose de Jesus
