Lafaek News—Kompania Zyahfast Unipesoal Lda ho nia traballador abandona projetu Uma Dignu ba Povu (UDP) iha suku Muapitine postu administrativa Lospalos munisípiu Lautém ho valor kontratu: $ 564,256.74 USD ho total uma dignu 15.
Prosesu konstrusaun ba projetu uma dignu ba povu hamutuk 15 ne’e hahú konstroi iha loron 23 fulan Dezembru 2024, no sei remata iha fulan Dezembru 2025 abandonadu, kompania ne’ebé manan projetu refere seidauk finaliza hodi entrega ba governu liu hosi Vise Primeiru Ministru no Ministru Dezenvolvimentu Rural Habitasaun Komunitaria ne’ebé lidera hosi Eng. Mariano Assanami Sabino Lopes hodi inaugural molok entrega ba povu.
Tuir fontes ofisial ida ba Lafaek News iha Suku Muapitene katak konstrusaun ba uma dignu governu planu harii ba komunidade Muapitine total hamutuk 15, maibé kompania foin halo uma haat (4) nia konstrusaun foin pursentu 50, no trabailador sira ho kompania abandona hahú husi inísiu fulan Dezembro tinan 2024 too 2025 abandona.
Trabaildor sira halai fila hotu ba ida idak nia munisípiu no sidadaun Indonézia ida mak sei hela, maibé lakleur nia mos halai, Trabaildor ida ne’ebé lakohi publika nia identidade ba lafaek news iha Suku Muapitine hateten mos sei fila tanba ema sira ne’ebé servisu ho nia mos fila hotu ona ho razaun kompania la selu no kompania foin selu de’it 500, hahu inísiu konstrusaun no material mos tarde.
Trabailador husi Indonézia ida mos sei fila ba nia rai tanba ba nia hahan mos laiha ona trabailador Indonézia ne’e ba da-daun ajuda hela komunidade ida nia uma hodi monta kramik.
Tuir trabailador ida ne’ebé lakohi publika nia identidade katak nia tauk fo informasaun tanba nia hetan kontratu husi kompania.
“Ha’u nia kolega sira baruk fila hotu ona agora ha’u mesak de’it, ha’u mos atu fila ba Indonézia ona tanba ha’u mos osan laiha ona ho hahan ba ha’u laiha ona,” dehan sidasaun Indonézia ho lian Indonézia ba Lafaek News iha 05/01/2026.
Iha fatin hanesan, badaen hosi Oe-Cusse oan ho naran Octoviana Coa informa ba Lafaek News liu husi telfone hateten, la’os trabaillador mak abandona servisu, kompania mak halo tarde tanba material konstrusaun tama tarde liu, ho razaun ne’e traballador sira abandona servisu, tan ne’e la’os sala traballador nian.
“Sasan mai mai tarde ami konfrima sira sira dehan, ami hein sasan la mai tuir nia tempo no natal no tinan foun sira la fo osan tan ne’e ami fila hotu hodi halo servisu,” badaen ne’e haktuir ba Lafaek News liu hosi telefone ba Lafaek News iha kuarta (07/01/2026).
Badaen Oe-Cusse oan ne’e informa tan katak kompania hapara sira dala rua ona Grupo husi Oe-Cusse foti uma tolu no uma rua seidauk taka hotu tanba besi ba bee dalan laiha no uma ida mak taka ona kalen, ikus mai kompania foin fo osan 3000 dolar durante tinan 1 servisu Iha suku Muapitine.
Tuir badaen ne’e katak tinan ida sira iha Muapitine kompania fo de’it foos saka ida.
Hatan ba prekupasaun hirak ne’e, Diretor Kompania Zyahfast Unipesoal Ida Agustinho Januario Pereira, reposta ba Lafaek News liu husi telefone hateten nia parte rekoiñese trabailador sira abandona no fila hotu tanba Kompania sei hapara sira hotu hodi buka fali ema foun atu kontinua servisu.
“Sira abandona servisu ne’ebé ami sei hapara sira no ami sei buka fali ema foun hodi servisu,” diretor kompania ne’e esklarese.
Nain ba kompania ne’e argumenta, nia parte koa’alia ona Owner atu aumenta tan kontratu ba projetu refere ho durasaun fulan 6 tan hafoin bele finaliza, tanba kontratu dahuluk nian durasaun tinan 1 remata ona.
Diretor kompania ne’e mos hatan ba preokupasaun trabaillador nia osan katak kompania halo kontratu ho sira no kompania halo pagamentu ona osan dolar 1000 ba sira, tuir kontratu trabaillador serviau too porsentu 50 mak kompania foin osan porsentu 25, no agora sira nia servisu seidauk too porsentu 50.
“Foin dadauk ami intrega osan dolar atus ida kada uma ida no sira husu osan maibe ami dehan ba sira katak imi nia servisu seidauk too 50 % ami labele fo osan tan lai,” nia relata.
Kompania mos promete katak konstrusaun ba projetu uma dignu ba povu hamutuk 15 ne’e sei remata tanba kontratu hanaruk tan fulan 6, tanba ne’e kompania sei finaliza projetu ne’e molok entrega ba governu.
“Ami mos halo ona pedidu pagamentu ba MInistériu Dezemvolvimentu Rural fo sira osan porsentu 6, ami nia uma ba ona porsentu 61 no ami mos ko’alia ona ho owner, maibe dehan ami hatama fali pedidu detailu nian mak foin bele halo pagamentu, maibé ami kompania prontu nafatin halo ami nia servisu, tanba governu fo fiar ami servisu, maibé ami mos husu governu atu apoiu ami karik ami hatama ami nia pedidu pagamentu atu bele haforsa ami nia forsa nune’e ami bele hala’o ami nia servisu iha terenu ho di’ak,” nain ba kompania ne’e hakotu lia.
Entretantu, osan ne’ebé kompania utiliza ba konstrusaun valor kontratu: $ 564,256.74 USD uma hamutuk 15, no númeru kontratu 276/DNA/MDRHC/2024.
Observasaun jornalista Lafaek News hare direta iha terenu nota katak uma dignu 4 mak kompania taka ona kalen no fui ona simente, maibé seidauk fui hotu no seluk monta mos janela no odomatan no uma 11 ne’e balun hada ona batako no balun foin harii fondasi.
Jornalista : Acacio Pinto
