Lafaek News—Militantes Partidu Os Verdes Timor hosi postu administrativu Matebian munisípiu Baucau, sira deside ba hamutuk ho KHUNTO iha ámbitu reajustamentu estrutura foun.
Iha serimonia reajustamentu estrutura partidu KHUNTO iha postu Matebian, José dos Santos Naimori destaka konfiansa másimu ba estrutura foun sei servisu maka’as hodi akumula maluk seluk ne’ebé hakarak hamutuk ho KHUNTO hodi atinje objetivu ida iha eleisaun parlamentár 2028.
Naimori Bucar fiar mos militantes hosi partidu sira seluk hanesan Os Verdes, PLP ho PD ne’ebé afilia ba KHUNTO signifika hatudu sira nia vontade iha prosesu demokratizasaun, maibé partidu hanesan instrumentu ida atu ba ukun, maibé hanesan Timor-oan tenke kaer liman hamutuk hodi lori Timor ba oin, ida ne’e mak KHUNTO nia hakarak.
“ Ita respeita no simu afiliante husi Partidu Os Verdes de Timor ne’ebe hili dalan atu hamutuk iha partidu Khunto parabens, mai ita hamutuk hateke ba oin, lori Timor ba atinje objetivu ida atu liberta povu hosi kiak no mukit,” Lider Supremu Partidu KHUNTO, José dos Santos Naimori Bucar, hatoo iha nia diskursu serimonia fo posse ba estrutura foun iha postu administrativu Matebian,” 16/08/2025.
” ohin ita la’os kampaña, maibé ita re-estrutura ba ita nia estrutura liu-liu ba posto Matebian ne’ebe ita seidauk, ba ita boot sira ohin foin simu pose atu ita presiza servisu ita hakarak manan tuir mehi, ita presiza servisu, servisu mak hatudu rezultadu, entaun mai ita hotu-hotu servisu hahú husi estrutura nasional too baze, atu atinje ita nia mehi ne’ebé mak ita hotu hakarak liu ba dezenvolvimetu rai-laran, hau fiar ho kapasidade ne’ebé ita boot sira votus Khunto nian sei aumenta diak liután,” lider supremu ne’e argumenta.
Naimori Bucar rekomend atu estrutura postu Matebian atu servisu maka’as nune’e bele hatudu rezultadu ida tuir duni tarjeitu partidu KHUNTO nian iha eleisaun prezidensiál no eleisaun parlamentár 2027-2028
“Ita haree ba posto ne’e foun ita halo re-estruturasaunatu halo servisu prepara ba 2027 no 2028 ida ne’e mak ohin ita mai iha ne’e, sira simu ona pose mai husi suku 5, ita nia esperansa mak oinsá ita hotu-hotu servisu hamutuk proteje povu liu husi polítika ida, ami nia garantia ba 2027-2028 mai husi ami nia domin ne’ebé ami oferese ba povu, se povu senti katak programa Khunto nian di’ak mak povu sei hili,” nia sublina.
Iha fatin ne’e, reprezentante afiliantes husi Partidu Os Verdes de Timor, Rodolfo dos Reis Cabral deklara ho membru nain rua deside hamutuk ho Partidu Khunto tanba haree Khunto iha polítika ne’ebé la haree ba Kores maibé importansia liu tane ás unidade nasional
“Ami na’in tolu mak halo afilisaun desizaun ida ne’e ha’u hakarak ba partidu Khunto tanba iha programa no plataforma polítika ne’ebe mais relevante prioridade ba povu Aileba no ain-tanan sira, no tau as Unidade Nasional, justisa sosial no la haree ba kór, rasa, relijiaun no sira seluk, ne’e mak sai motivasaun ba ha’u ho kolega sira hodi halo afilia ba KHUNTO,” tenik nia.
Ikus liu kordenador KHUNTO postu administrativu Matebian, Albino Moises Soares Kompromete sei servisu hamutuk ho estrutura munisípiu no posto hodi haklean programa partidu Khunto nian tun ba iha suku no aldeia sira iha territorial munisípiu Baucau.
“Ha’u sei servisu maka’as no servisu hamutuk ho estrutura munisípiu hodi buka militantes barak atu bele prepara ba festa boot 2027-2028,” Albino otimista.
Joranalista” Mateus F.de Deus
