Lafaek News—Populasaun no Autoridade Lokal Postu Administrativu Loré, Munisípiu Lautém preokupa ho kondisaun estrada ne’ebé sai grave hasusar komunidade Loré asesu ba merkadu iha postu Lospalos.
Parte autoridade lokál ba postu Administrativu Loré husu governante sira hodi bele tau matan ba infraestrutura bázika estarda ne’ebé afeta tebes ba movimentasaun povu iha baze.
Xefe suku Loré 1, Abilio Amaral, informa husu parte relevante hodi bele tau matan infraestrutura estrada ba postu Administrativu Loré no suku Loré 1 hodi sai hanesan ho postu administrativu sira ne’ebé nabilan.
“Más ita nia esperansa katak ho prezensa ita boot sira mai ida ne’e no postu ida ne’e iha futuru buat balun ne’ebé maka ita hare ba ladún di’ak ladún la’o ita nia governante sira bele hare husi kobertura ida ne’e bele tau plano nune’e bele dezenvolve suku Loré primeiru no postu ida ne’e sai liu tan hanesan ho postu sira seluk i buat barak ne’ebé maka lao i la lao duni iha ami nia postu liu-liu infraestrutura bázika liu-liu ba estrada ohin ita boot sira liu mai to iha ne’e ha’u hanoin senti duni kondisaun ne’e oinsá ne’ebé ha’u labele esplika tanba ita boot sira liu mai ita boot sira sente katak ami nia estrada kondisaun mak nune’e” Autoridade lokál afirma iha suku Loré 1 kinta feira (30/05/2024)
Autoridade lokál ne’e rekomenda IX governu atu toma atensaun ba estrada ne’ebé grave bo’ot iha postu Administrativu Loré, tenke prioridade ona hodi bele fasilita povu agrikultores sira lori sira nia produtu local ba asesu iha merkadu.
Iha sorin seluk komunidade Izelia Fernandes nudar komunidade postu administrativu Loré, reforsa kondisaun estrada husi Lospalos liga postu Loré dezde tempu Indonezia too ohin loron seidauk hadia, husu governu foun ne’ebé lidera husi Kay Rala Xanana Gusmão atu orienta ona Ministériu Obras Publikas hodi mai haree atu bele hadia iha Orsamentu Jeral estadu 2025 nian.
“Ami la bá fan iha ne’ebá maibé ami fan iha ne’e de’it tanba estrada hanesan ami lori ba iha dalan bele nakfera hotu ona ami forsa la to’o atu lori ba fan iha merkadu modo modo mak iha mós ami la bele bá fan, ita han iha ne deit atu bá fan hanusa, ita ba iha dalan modo sira ne’e sai namlaek hotu ona mak foin to’o iha merkadu depois ita mós hanoin ba ita nia vida ita atu to’o ga la to’o ita la hatene ne’ebé ita labele ba merkadu iha mós ita han deit” haktuir Izelia Fernandes
Tuir nia katak relasaun kondisaun estrada ne’ebé grave difikulta tebes populasaun sira asesu ba saúde liu-liu inan isin rua sira bainhira atu partus tenke la’o ho distánsia dook hafoin asesu ba sentru saúde.
“Isin moras hotu to uma senti isin kolen los toba la di’ak maibé ita halo nusa fo hatene ona ba estadu mós lakohi halo to’o agora, hanesan inan isin rua loron sei dook halai neneik to iha Lospalos hein to’o fulan partus mak foin fila maibé iha Lospalos to’o tinan ida mak foin mai fali, fulan besik mak ba ne’e ita la bele bá ona tanba estrada at ne’e,”hakotu nia
Programa TOR kobertura ba tinan ne’e iha munisípiu Lautém postu administrativu Loré, hetan apoiu husi Assosiasaun Jornalista no OXFAM Timor Leste hodi mobiliza jornalista husi media nasional sira tuun direta ba baze hodi identifika difikuldade povu kiik iha area remotas.
Jornalista : Aniceto Dias
Editor : Agapito de Deus
