Lafaek News—Fundasaun Kay Olo, ho Xanana Reading Room, kinta (07/12/2023), hala’o vizita ofisial ba Eskola Ensinu Sekundaria Tékniku Vokasional Lauala postu administrativu Ermera, munisípiu Ermera hodi observa kondisaun eskola no enkoraza estudante sira atu hatoman an lé hodi matenek liberta kiak ho mukit iha Timor Leste.
Reprezentante Prezidente Fundasaun Kay Olo, Abilio Barros, esplika objetivu fundamental husi vizita ne’e mak fundasaun Kay Olo ne’ebé sei hamahan an hela iha Xanana Reading Room atu bele enkoraza estudante sira bele lé nune’e bele koñese situasaun jerál iha Timor Leste inklui mundu.
“Ha’u mai hanesan reprezenta Prezidente Fundasaun Kay Olo, objetivu husi vizita ne’e mak atu haree no enkoraza joven sira iha ensinu sekundária tékniku vokasional Lauala oinsá motiva no enkoraza sira hanesan foinsa’e, saida mak presiza haree no saida mak sira presiza halo hanesan ema estudante,” dehan Abilio Barros ba Lafaek News hafoin ensera vizita iha eskola tékniku vokasional Lauala.
Barros haktuir mensajen husi Prezidente Fundasaun Kay Olo, enkoraza estudante sira atu lé barak atu prepara joven sira ba futuru ne’ebé di’ak.
Reprezentante Kay Olo ne’e splika mos razaun ativdade vizita refere iha kedan loron 7 de Dezembru invazaun Indonézia iha Timor Leste, tuir nia hala’o vizita ne’e iha kedan loron hanesan reflesaun ida ba libertadores sira hodi valoriza liu husi joven no estudante sira liu husi istória ne’ebé rai hela ba Timor oan tomak.
Iha sorin seluk, Diretór ezekutivu Eskola tékniku Vokasional Lauala Gleno, Fr. Theodoro, Demon EMM, SPD, nia parte hatoo agrdesimentu boot ba ekipa fundasaun Kay Olo ne’ebé husi Dili ba vizita ona eskola tékniku vokasional Lauala, ho razaun ida atu hametin amizade no haburas liután kooperasaun hodi hateke ba future hadia joven sira nia matenek.
“Ha’u lori eskola nia naran hatoo agradesimentu boot ba Prezidente Kay Olo, maske maun Kay Olo lai mai, maibé ekipa mai ona, hein katak loron ida Kay Olo sei mai hodi vizita ami nia eskola ne’e hodi motiva estudante sira lé hodi sai matenek liberta povu husi kiak no mukit iha future oin mai,” nia hakotu.
Observasaun lafaek news nota, iha vizita ne’e dahuluk ne’e kompostu hushi Xefe Gabinete Ministériu Saúde, Asesor SEKOMS, reprezentante Xanana Reading Room, simu ho dansa kultura husi estudante TékVok Lauala, akompania Xefe Suku Lauala ho professores sira simu ekipa Kay Olo hodi antusiazmu durante oras haat nia laran hafoin ensera ekipa fila fali ba Dili.
Ekipa Kobertura : Lafaek News
