Lafaek News–Asosiasaun iha Partidu Sosialista de Timor (PST), hanesan ACBN, CRN1, MOKATIL no MAPK, rekomenda ba Prezidente eleitu periodu 2022-2027, Premiadu Nobel da Paz, José Ramos Horta atu dizolve parlamentu nasional tuir komprimisu polítika iha kampaña eleitoral iha ronde dahuluk too segunda volta.
Assosiasaun Combatentes Brigada Negra (ACBN), CRN1, MOKATIL no MAPK nu’udar movimentus hirak ne’ebé hamutuk ho movimentus seluk tan hamrik iha defende estadu direitu demokrátiku no defeza konstituisaun RDTL liu husi dalan repozisaun ordén demokrátiku konstitusional husi kedan 2020, no-mós apoia kandidatura José Ramos Horta ba prezidente repúblika periodu 2022-2027, reprezenta militantes, adeptus tomak hodi hatoo parabens ba José Ramos Horta, ne’ebé eleitu ho votus válidus 62,09%.https://lafaeknews.tl/horta-dizolve-parlamentu-laos-prioridade-karta-husi-fretilin-seidauk-le/
ACBN, CRN 1, MOKATIL no MAPK, hakarak hatoo ba povu tomak ne’ebé vota ba José Ramos Horta, agradesimentu ba povu hotu nia votu, asosiasaun nain haat deklara katak sei konsisténsia iha Timor Leste nia projetu eleitoral repojisaun ordem konstitusional liu husi rekonfigurasaun maioria parlamentar no karik hetan blokeiu husi forsas seluk, dalan ikus liu mak dizolusaun parlamentu nasional no marka elesaun antisipada,’’deklara porta voz Hugo Lourenço da Costa ba jornalista sira liu husi konferénsia imprensa iha sede PST, sábadu (23/04/22),
ACBN, CRN 1, MOKATIL, no MAPK mós hakarak uza momentu ida ne’e hodi felisita Francisco Guterres Lú Olo, liders plata forma ne’ebé Marí Alkatiri lidera, tanba sira ho fuan boot no maturidade hala’o konferénsia imprensa hodi deklara simu rezultadu eleisaun prezidensial ronde daruak, ne’ebé fo vitoria ba José Ramos Horta, desizaun hatudu maturidade politika nu’udar ema demokratas no lideres povu ida ne’e nian.
Ami presiza deseja maiores susesu no felisidade ba iha ezersisiu kargu importante ida ne’e, povu hein prezidente foun RDTL nia desizaun ne’eb hatan ba povu tomak nia espetativa,ami mós sauda maun boot Kay Rala Xanana Gusmão no partidu CNRT ne’eb fo apoiu no dezenvolve kampaña hodi lori susesu ba ita nia kandidatura. Ami mós hein katak postura ne’ebé hatudu ona sei mai fasilita entendimentu ida hodi hamutuk ita foti desizaun ba hatur hikas iha nia fatin estadu direitu demokrátiku no ita hotu kumpre konstituisaun RDTL nu’udar baze ba dezenvolvimentu ba ita nia estadu nasaun,’’katak nia.
Porta vóz afirma, ema hotu nia hanoin dalan úniku maka prezidente repúblika eleitu dizolve parlamentu hodi fo hikas poder ba povu ati hikas iha fatin estadu direitu demokrátiku no hametin no kumpre konstituisaun RDTL nian.
Ami sauda inisiativa diálogu, maibé diálogu tenke lori partisipantes hotu atu simu desizaun rekonfigurasaun maioria parlamentar, karik maka dalan blokeiadu ba rekonfigurasaun maioria parlamentar maka prezidente RDTL ne’ebé eleitu no simu mandatu popular sei halo dizolusaun parlamentu nasionál, estabelese goveru de jesaun marka data eleisaun antisipadas no define orsamentu ida atu rezolve povu nia susar durante periodu governu jestaun ne’ebé labele liu fulan 5,’’ porta voz ne’e hakotu.
Jornalista : Agapito de Deus
Editor : Floriano Soares
