Lafaek News-(Lautém), kandidatu Prezidente Repúblika númeru sorteiru 1, Premiadu Nobel ba Paz, José Ramos Horta afirma, presiza hadia justisa tanba komunidade internasional la fiar ona sistema judisiáriu iha Timor Leste.
Ramos Horta hatoo asunte iha kampania aberta ba datoluk iha kampu futebol eis dormitoriu 745 Lautém, domingu (10/04/22), katak komunidade internasional la fiar ona judisiáriu iha Timor susar dada investor mai investe iha rai-laran
Ita tenke haree bá justisa, tambá komunidade internasionál la fiar ona ita nia sistema judisiáriu, la’ós fasil atu dada investor, presija investimentu internasionál hodi loke kampu servisu tambá atu dinamiza ekonomia la’ós estadu de’it,’’ Ramos Horta akresenta.
Hodi dehan, Kona-bá investór, iha apoiante rihun resin nia oin, Horta sublina tenke hare justisa tambá investor presija haree nasaun ne’e nia sistema judisiáriu.
Iha sorin seluk, Premiadu Nobel ba Páz ne’e ko’alia mos kona-ba potensial iha munisípiu 3 parte loro sa’e nian bele sai zona turístiku, sentru komersiál no dezenvolve agrikultura.
Lautém, Baucau, Viqueque labele sai munisípiu separadu, tenke haree munisípiu ida integradu ekonómikamente, Lautém bele sai zona turístiku importante, dezenvolve didi’ak pekuária, lori Baucau sai sentru komersiál bo’ot no Viqueque dezenvolve agrikultura’’, dehan Horta.
Antes ne’e, RAEOA Oecusse sai zona espesiál, maibé eis-prezidente repúblika 2007-2012 ne’e hateten, presija hadia no balun kontinua.
Ita kontinua dezenvolve RAEOA, iha buat balun ne’ebé presija hadia no balun ita bele kontinua, no balun taka, sira tenke hamutuk ho NTT (Indonézia), sai esportadór ba sira la’ós sosa de’it husi NTT, integra mós ho Austrália no ASEAN, ne’e mak Prezidente Repúblika, Parlamentu Nasionál no Guvernu tenke hamutuk hare assuntu ne’e,’’ Hateten Horta.
Entretantu, partisipa iha kampaña refere, populasaun inklui militante partidu CNRT, partidu apoiante, simpatizante no movimentu ne’ebé ezíste mai husi postu-administrativu 5 konsentra no hakonu kampu futebol 745 Lautém no hetan observasaun husi observador nasional CNE, STAE no Uniaun Europea.
Jornalista : CE. Lautém
Editor : Agapito de Deus
