Lafaek News–Juventude Tibar postu administrativu Bazartete, munisípiu Likisá, manifestu sira nia apoiu totál ba kandidatu independente ho númeru sorteiu 1, eis Primeira Dama, Isabel da Costa Ferreira ba eleisaun prezidensial periodu 2022-2027.
Portavóz Afonso Soares hateten, relasiona ho festa demokrasia ne’ebé sei festeza iha loron 19 fulan marsu 2022, eleisaun Prezidensiál periodu 2022-2027, juventude Tibar fó apoiu tomak ba kandidata independente Isabel da Costa Ferreira atu asume kna’ar nu’udar Prezidente Republika.
Ami juventude Tibar, iha biban murak ida ne’e fó ami nia apoiu sem rezerva ba kandidata independe Isabel da Costa Ferreira ba eleisaun Prezidente Repúblika periodu 2022-2027,” afirma Afonso Soares liu husi komunikadu imprensa iha Sede PLP Tibar, sábadu (26/02/2022).
Razaun tanba kandidatu Isabel da Costa Ferreira nu’udar kandidata independente hodi asegura unidade nasionál no nakonu ho valór sira hanesan kariedade, solidariedade, onestidade, tolerante no paz.https://lafaeknews.tl/Isabel-ho-vizaun-simples-mas-ambisioza-dezenvolve-fiar-familia-ho-patria/
Ami hanoin pertinente tebes liu-liu iha istória Timor nian iha momentu krusiál sira hanesan dadaun ne’e, atu sai Prezidente Repúblika tenke jéneru feto, fero ida ne’ebé iha abilidade kompeténsia, integridade no koñesimentu i asima de tudu,” dehan Nia.
Portavóz ne’e akresenta, Timor-Leste presiza ema ida ne’ebé iha sentimentu hanesan inan ida. Neduni tempu ona atu ezerse feto ba Prezidente Repúblika ho dalan ida promove igualdade jéneru Timor-Leste no konfiansa tomak deposita ba kandidata independente Isabel da Costa Ferreira iha festa demokrasia ida ne’e.
Maluk joven sira, inan aman, tiun, tian, maun, bin no avó sira hotu Timor nian tomak, husi Oekusse to’o Jako, tasi feto no tasi mane, ami enkoraja nafatin ita hotu mai hamutuk ho fuan ida, lian ida, kompremisiu ida, mehi ida hodi hodi apoia sem rezerva ba kandidatura independente doutora Isabel da Costa Ferreira ba Prezidente Repúblika periodu 2022-2027,” hakotu Afonso Soares.
Jornalista : Juvita dos Santos
Editor : Agapito de Deus
