Lafaek News–Vítima inséndiu merkadu Manleuana, Teresa da Silva, sente trieste ho ropa ne’ebé nia fan konverta ba osan besik rihun 3 mak ahi han motuk iha tuku 6 ho balun iha merkadu Manleuana
Ha’u nia ropa ne’ebé ahi han iha meja leten barak liu, kompara ba osan dolar rihun 3 mak ahi han, tanba hau fan fatin barak mak ha’u konta hanesan ne’e,’’ dehan Teresa da Silva ba Lafaek News iha merkadu Manleuana, segunda (14/02/22).
Teresa esplika, nia rasik seidauk hatene motivu husi inséndiu ne’e, tanba bombeirus rega ahi mate ona mak negosiante OB hotu foin too iha fatin akontesimentu inklui mós nia (Teresa), too iha balkaun faan fatin hateke de’it ahukdesan suar.
Ami too mai bombeirus rega hotu ona, hateke de’it ahukdesan nia suar, entaun ami la hatene see mak sunu,’’ katak vítima ne’e
Costantino Pereira nu’udar sasin ne’ebé salva sasan balun husi inséndiu ne’e haktuir nia rasik mós seidauk hatene se loos mak sunu uma filera fan obralan ne’e, hakfodak ahin ona mak halai ba hodi dudu sai motorizadas ida ne’ebé para besik hela fatin inséndiu ne’e.
https://lafaeknews.tl/governu-sei-hadia-infraestrutura-insendiu-manleuana/
Ha’u sai mai atu foti foos, entau tiu ida halai mai dehan ahi han obralan, ha’u sai ba ahi han too ona klaran, entaun hau primu sira salva de’it sasan balun ne’ebẽ ahi seidauk han no ami konsege salva motor ida,’’ katak sasin ne’e.
Entretantu, motivu husi inséndiu refere seidauk hatene, lafaek news tenta husu sasin seluk mós ho versaun hanesan katak molok atu ba haree maibé ahi han tiha ona, tanba ne’e sira la hatene see loos mak sunu fatin faan obralan ne’e.
Hau mos rona de’it ema hakilar, tanba hau sei dasa hela rai, estudante Canossa mak halai mai dehan ahi han obralan,’’ katak sasin Leonito.
Entretantu, total negosiante ne’ebé antes faan ropa obralan iha fatin ne’e hamutuk ema nain 34, maioria Timor-oan, kada negosiante lakon ropa obralan kompara ba osan rihun 2, too dolar rihun 4 mak lakon.
Iha akontesimetu ne’e, ekipa bombeirus, jestaun merkadu no PNTL too kedan iha fatin akontesimentu hodi rega mate atu labele da’et ba fatin negosiante seluk nian.
Jornalista : Joao da Costa Soares
Editor : Agapito de Deus
