Lafaek News–Sekretáriadu Estadu Juventude no Desportu (SEJD), asina akordu ho Comoro Child and Youth Centre (CCYC) hodi apoiu fundus rihun tolu-nulu ($30.00) ba grupu kreativu joventude hodi implementa programa estimulu emprendedorizmu sosiál.
Tuir xefe gabinete Sekeratriu Estadu Juventude Desportu (SEJD), Alcina Filipe Ximenes, esplika, asina akordu ho Comoro Child and Youth Centre (CCYC) atu serbisu hamutuk hodi hala’o programa estimulu emprendedorizmu sosiál iha juventude sosial no suku.
Programa ida ne’e naran programa estimulu emprendedorizmu sosial juventude suku ne’ebe governu konstituisional liu husi SEJD aloka orsamentu hamutuk $30.00 mil ba sentru joventude Komoro atu apoiu ba iha grupu kreatividade joventude sira ne’ebe iha inisiativa rasik atu hakbi’it liu tan sira nia atividade,” dehan Xefe gabinete SEJD Alcina Ximenes ba jornalista sira iha seremonia CCYC, sesta (26/11/2021).
Xefe gabinete salienta, joven barak iha talentu boot, maibé ladun esplora, entaun liu husi programa ne’e bele esplora liu tan juventude sira nia kreatividade no sira nia talentu . Neduni CCYC serbisu hamutuk ho SEJD sei kobre iha 12 munisípiu inkliu RAEOA.
Ami halo iha nebá, estabelese hanesan iha kritéria nia laran katak atu apoiu ba iha kategoria atividade hanesan pekuaria, turismu, hortikultura, agrikultura buat sira ne’e iha laran hotu, entaun liu husi sentru Joventude sira estabelese fali sira nia ekipa ida, avalia fali proposta sira ne’ebé mak tama iha sentru ne’e, tuir duni kritéria sira ne’ebé iha,” informa Nia.
Iha fatin hanesan, Meneger CCYC Delio Mali Lopes, hatete, objetivu husi asina akordu ne’e atu serbisu hamutuk ho SEJD hodi sai hanesan matadalan ida ne’ebé bele kria grupu benefisiáriu sira ne’ebé konsege hetan aprovasaun proposta husi ekipa oradór sira oinsá sira bele implementa fundus refere tuir matadalan.
Fundus ba apoiu estimulu aprendedorizmu sosiál kreativu sira ne’e husi SEJD, aloka ba sentru juventude Komoro, ho nune’e Sentru Joventude Komoro divulga informasaun ba grupu sira ne’ebé mak iha suku laran liu-liu postu tolu mak hanesan, Dom Aleixo, Verra-Krus no Na’in Feto no mos joven kreativu sira asesu fundus refere hodi dezenvolve sira nia grupu sira ne’e,” nia informa.
Jornalista : Joni Mau Risa
Asisten Editora : Juvita dos Santos
