Kovalima-Lafaek News-Reprezentante Konsellu Vetaranus munisípiu Kovalima (KVMK), Joaquim Barros alias Sikak Le’et husu kanidatus sira labele tauk atu konta nia istória durante iha funu laran.
Ha’u husu ba imi kandidatura nain 406 labele tauk atu ko’alia, tenke brani bainhir ita nia maun sira husu, depois ida tan mak ha’u atu dehan ba imi, saida mak imi hasoru hateten sai,” dehan KVMK Joaquim liu husi nia diskursu iha sede suku Zulo, Zumalai, Kovalima, kinta 30/09/2021.
Iha fatin hanesan, Representante Forsa Armada Libertasaun Nasional Timor-Leste (FALINTIL) regiaun IV Asistente Polítika Militar Atual hanesan konsellu Veteranus Munisípiu Ainaro Julio da Conceiḉao “Loro Mesak” sujere kandidatura sira iha Suku Zulo labele tauk atu konta nia Istória funu nian.
Husu ha’u nia Inan, alin feto no mos Maun alin sira hotu, labele mo’e atu konta saida mak Militar Indonesia sira halo ba imi, Tanba ita bo’ot sira mak hatene istoria, Tenke konta sai no lalika subar mai ami,” Loro mesak esplika.
Entertantu Verifikasaun dadus Kandidatura Veteranus ne’ebé rejistu tinan 2009, iha munisípiu Kovalima hamutuk, 9,962, No equipa verifikasaun kobre ona dadus kandidatura Veteranus Postu Administrativu Fatululik, Fatumea, Tilomar ho Fohorem, verifika ona dadus hamutuk rihun rua atus lima hat nulu resin lima (2,545).
Jornalista : Orlando Magno
Editór : Agapito de Deus
