Lafaek News–Konsellu Ministru aprova ona projetu dekretu lei, ne’ebé kria subsídiu ba inan isin-rua no ba labarik sira, designadu núdar bolsa da mãe jerasaun foun.
Ministru Prezidénsia no Konsellu Ministru (MPKM), Fidelis Manuel Leite Magalhães hateten, projetu dekretu lei ne’e aprezenta husi Vise Ministra Solidariedade Sosiál, Signi Chandrawati Verdiál, ne’ebé kria subsídiu ba inan isin-rua no ba labarik sira, designadu nu’udar bolsa da mãe – jerasaun foun, no ba alterasaun dahuluk ba Dekretu-Lei nu.18/2012, loron 4 fulan-abril.
“Ho projetu dekretu lei ida ne’e, atu reforma programa “Bolsa da Mãe” , ho hanoin atu garante katak ida ne’e bele jere impaktu signifikativu ida hodi hamenus ki’ak no ba promosaun kapitál umanu nasionál,” dehan Fidelis hafoin remata enkontru Konsellu Ministru iha Aitarak-laran Dili, kuarta (01/09/21).
Governante ne’e akresenta, Bolsa da Mãe hahú atu integra prestasaun adisionál rua, ne’ebé ho objetivu atu fó apoiu sosiál ba inan isin-rua no ba primeira infánsia, hodi hadi’a saúde no nutrisaun materna no infantil, atu promove inkluzaun ekonómika no atu fomenta ekonomia lokál.
“Programa sei implementa ho forma fazeada ka progresiva, hodi asegura hanesan prioritária atuasaun iha área jeográfika ho indíse ki’ak no mál nutrisaun no protesaun ba inan isin-rua no primeira infánsia,” informa Fidelis.
Programa ne’e sei haluan ba teritóriu nasional tomak durante tinan 5, hahu iha tinan 2022, ho munisípiu Ainaro no Bobonaro no ho Rejiaun Administrativa Espesiál Oe-kuse Ambeno (RAEOA).
Entretantu iha tinan 2023, Bolsa da Mãe – jerasaun foun sei haluan ba munisípiu Kovalima, Likisá, Manatutu, no Vikeke. Munisípiu Ermera, Baukau, Aileu no Lutem sei inklui iha programa tinan 2024 nian, ikusliu, Bolsa da Mãe sei abranje iha munisípiu Dili, iha tinan 2025.
Jornalista : Juvita dos Santos
Editór : Agapito de Deus
