LafaekNews-Governu liu husi reuniaun Konsellu Ministru (KM) deside ona hodi kontinua ‘sulan’ ka impoin konfinamentu Obrigatóriu Jerál ba populasaun iha munisípiu Dili, to’o loron 9 fulan setembru tinan 2021.
Ministru Prezidénsia no Konsellu Ministru (MPKM), Fidelis Manuel Leite Magalhães, hateten, hafoin halo análize ba aprezentasaun husi pontu situasaun epidemiolójika nasionál, husi koordenadór sira Sala Situasaun Sentru Integradu Jestaun Krize (SIJK) nian, desidi ona, atu mantein Konfinamentu Obrigatóriu Jerál (lockdown) ba populasaun iha Munisípiu Dili, inkluí ema ne’ebé maka vasina ona kontra COVID-19, to’o loron 9 fulan-setembru tinan 2021.
“Ema sira hotu iha Munisípiu Dili, inkluí sira ne’ebé maka vasina kontra COVID-19, kontinua hela iha uma, bele sai de’it tanba razaun Saúde, ba serbisu (iha kazu administrasaun públika, superiór ierarkiku define funsionáriu ne’ebé maka dispensadu husi dever komparénsia), atu asesu ba sasan no serbisu ba nesesidade bázika no atu simu vasina kontra COVID-19” dehan Fidelis liu husi komunikadu imprensa iha Auditórium Ministériu Finansas Aitarak-laran Dili, kuarta (01/09/21).
Fidelis esplika, Kompara ho rezolusaun anterior rejista de’it alterasaun rua, permite atu sai husi uma ba fatin seluk hodi realiza resenseamentu eleitorál no ba parte seluk atu asegura funsionamentu ba empreza prestasaun servisu sira ba kontrolu peste nian (Pest Control), informa Nia.
Ho nune’e, la renova impozisaun Konfinamentu Obrigatóriu Jerál (lockdown) ba populasaun iha Postu Administrativu Ermera no Railaku, iha Munisípiu Ermera.
Jornalista : Juvita dos Santos
Asisten Editór : Egidio Nono
