Lafaek News-Governu liu husi Konsellu Ministru  aprova alterasaun projetu deliberasaun kona-ba Ppanu dezenvolvimentu ba Portu Dili.

Ministru Prezidénsia no Konsellu Ministru Fidelis Manuel Leite Magalhães hateten, konsellu ministru aprova ona alterasaun projetu deliberasaun planu dezenvolvimentu Portu Dili ne’ebé aprezenta husi Ministru Transporte Terrestre no Komunikasoins, José Agustinho da Silva, ne’duni planu ne’e aprova hodi prevee reestruturasaun no moderniza ba Portu Dili, hafoin transferénsia funsaun portu karga nian ba portu foun Tibar, no nia konversaun iha mariña ida no portu kruzeiru sira. 

“Ita boot sira hatene katak la kleur tan portu Tibar hotu ona, bainhira portu Tibar hotu ita sei iha Portu Dili ne’e ka ponte kais ne’e, agora ponte kais ne’e em vez ita soe de’it ka halo mamuk deit, saida mak governu ohin aprova ne’e katak sei iha planu dezenvolvimentu ida katak atu halo zona turístika ida ka sei sai kais ida ba ró sira ho karakter hanesan turizmu nian, ho karakter kiik sira, laos ró komersiál bobot ne’ebé mak lori kontainer ba mai” dehan MPKM Fidelis Magalhães ba Jornalista hafoin remata enkontru Konsellu Ministru iha Palasio Governu Dili, kuarta (28/07/21).

Governante ne’e akresenta, planu dezenvolvimentu ne’e mós planu boot ida ne’ebé Vise Ministru Transporte no Komunikasaun  mak hato’o, ne’ebé sei elabora ka dezenvolve hotu iha komponente ida, planu ne’e hanaran opsaun premiu husi projetu ne’e, ne’ebé pratikamente sei dezenvolve husi Tasi ibun Embaixada Portugal nian husi Sporting nia oin ne’e ba to’o iha Motaél no instalasaun oi-oin mak sei mosu iha nebá.

“Neduni ida ne’e projetu boot ida ne’ebé hetan prioridade husi Primeiru Ministru mós, hanesan sinál ida katak em vez de ita kolia deit kona-ba diversifikasaun ita nia ekonomia maibé ita mós tenke foti pasu ida hakat ida ho investimentu sira hanesan ne’e para bele sai hanesan motor ba dezenvolvimentu setór turizmu, entaun ida ne’e hanesan faze importante ida para ita bele diversifika ita nia ekonomia” informa MPKM.

Enkuantu prevee katak investimentu iha projetu atu garante retornu boot no iha aumentu turizmu  no investimentu privadu, no dezenvolve negósiu no kria empregu.

Jornalista : Juvita dos Santos

Editor        : Agapito de Deus