Lafaek news— Reitór Universidade da Paz, Adolmando Soares Amaral hatete, iha mandatu VIII governu ekonomia tun ba pursentu 8.3 tanba impase polítika, eleisaun antisipada no pandemia covid-19 halo governu dependente másimu ba orsamentu duodésimu.
Lider másimu UNPAZ ne’e esplika, Foin iha 2020 no 2021 mak iha orsamentu jerál do estadu, ho orsamentu jerál do estadu 1.8 millaun hamutuk ho orsamentu ratifikativu sa’e tan ba 2.1 millaun ne’e orsamentu ne’ebé bo’ot tebes, maibé ho orsamentu ne’ebé iha ita seidauk harmoniza ita nia ekonomia.
“Antes ne’e tanba impasa politika, eleisaun antisipada no pandemia covid-19 halo ekonomia monu tiha ba pursentu 6 iha 2019 no hosi 2020 to’o mai 2021 ekonomia tun hosi pursentu 6 ba pursentu 8.3 ekonomia monu,” dehan Adolmando iha nia kna’ar fatin Universidade da Paz, segunda (26/07/2021)
Haree hosi ekonomia monu ne’e bele dehan katak orsamentu ne’ebé bo’ot nia ezekusaun seidauk responde ba nesidade loloos. Bainhira ezekusaun responde loloos tuir governu nia polítika katak orsamentu ne’e bazeia ba programa, povu sente ona efeitu hosi dezenvolvimentu no kresimentu ekonomia ne’e sae ba leten.
“Oitavu governu ho orsamentu jerál ne’ebé bo’ot maibé seidauk konsege harmoniza ekonomia no seidauk responde ba nesesidade báziku sira hanesan, infraestrutura báziku, estrada, eletrisidade, bee moos, saùde edukasaun” tenik nia
Nia espera katak ekonomia labele tun ba puesentu 10 tanba ne’e perigozu boot ba ita hanesan nasaun ida, tanba ne’e orsamentu jerál estadu ne’ebé aprova tiha ona hamutuk ho orasmentu ratifikativu sira presija ezekuta tuir programa sira ne’ebé parlamentu aprova no Presidente promulga ona hodi hatan ba problema sira ne’e.
Iha planu estratéjiku 2011 no 2030 Iha buat balun ne’ebé governu presija halo revizaun, maibé buat balun tenke tau atensaun para depois ita kontinua ho orsamentu ne’ebé iha hodi dudu programa sira ne’e ba oin hodi hatan ba planu estratéjiku ne’e rasik
“Maibé karik ita ba ho odíu, ba ho vingansa ho dehan katak planu ne’e la di’ak entaun ita nia tempu uza hotu ba sobu hadia planu sira ne’e ikus mia ita la halo buat ida ba povu no rai ida ne’e too ita nia mandatu hotu,” hakotu nia.
Jornalista : Felisberto Fernandes
Editór : Agapito de Deus
