Lafaek News–Relasiona ezisténsia variante delta iha Dili, Prezidente Repúblika, Francisco Guterres Lú Olo, lansa reuniaun ho membru Konsellu Estadu no Konsellu Superior Defeza no Seguransa rona hanoin antes deklara EE ba dala-16 inklui konfinamentu obrigatóriu iha teritoria nasionál.
“Ohin enkontru KE no KSDS hodi rekomenda ba Prezidente Repúblika Fransisco Guterres Lú Olo, kona-ba pedidu governu nian, atu hatoo ba Parlamentu Nasionál, Parlamentu Nasionál hodi diskute atu estende ou la estende estadu emerjénsia ba dala 16,” dehan Xefe kasa Sivil Francisco Maria de Vasconselos iha Palasiu Prezidensial Nicolau Lobato Bairru-Pite Segunda 26/07/2021.
Prezidente Repúblika bolu membru KE-KSDS hamutuk halo reuniaun bazeia ba pedidu husi oitavu governu konstitusional no rezultadu diskusaun ne’e sei lori ba Parlamentu Nasionál hodi aprova estensaun ba estadu emerjénsia.
”Medidas sira hanesan uluk ne’e nafatin, tanba ita haree iha nasaun viziñu sira variante delta númeru sa’e makas kada loron atu prevene variante foun ida ne’e mak husu ba Parlamentu Nasionál atu diskute hodi estende ka la estende,’’ katak Vasconcelos.
Jornalista : Rita Moniz
Editor : Agapito de Deus
