Lafaek News–Sekretáriu Estadu Komunikasaun Sosiál, Merício Juvinal dos Reis “AKARA” informa, nia parte simu ona informasaun husi Ministériu Saúde no Sentru Integradu Jestaun Krize katak informasaun ne’ebé publikada husi mídia impresa balu moras variante tama ona Timor ne’e la loos.
Komunikadu imprensa ne’ebe lafaek news, asesu husi midia ofisial SEKOMS iha segunda (05/07/2021), sita relativa ho informasaun ne’ebe lansa husi midia impre balu katak variante delta ida tama ona Timor Leste, SEKOMS konsidera notisia ne’e la loos.
“Informasaun ne’ebé publikada husi mídia balun katak Corona vírus variante Delta tama ona iha Timor-Leste, ne’e la loos,” Akara hatan ba preokupasaun deputadu sira nian bainhira reprezenta Governu partisipa sesaun plenária iha Parlamentu Nasional, segunda 05/072021.
Akara esplika, atu identifika variante foun husi Corona vírus tenke liuhosi Genome Sequence Test ne’ebé normalmente haruka ba Melbourne-Austrália no presiza lori tempu semana tolu atu identifika loloos ezisténsia husi variante foun ne’e.
“informasaun loos no ofisiál kona-ba covid-19 mai husi Ministériu Saúde no Sentru Integradu Jestaun Krize, tanba ne’e mídia sira tenki halo konfirmasaun no tenki iha pensamentu krítika antes publika informasaun ne’ebé iha tendénsia provokativu hodi halo pániku komunidade,” Nia rekomenda.
Akara Afirma, relativamente ho preokupasaun deputadu sira nian kona-ba problema saúde, edukasaun, bee moos , eletrisidade, veteranu no asuntu importante sira seluk, SEKOMS hatete nia parte rejista no sei enkamiña ba ministériu kompetente atu fó solusaun (*).
