Lafaek News—Sekretáriu Estadu Ambiental ho Ajensia Nasionál Lisensiamentu Ambiental lansa komisaun Avaliasaun Impaktu Ambiental (KAIA) ba projeitu reabilitasaun meloramentu ateru Tibar hodi halo jestaun ba lixo no mós Ótel Hilton Dili Palm Springs.
SEA Deometro Amaral, infoma, lansa komisaun impaktu ambiental ba projetu boot rua ho kategoria (A) ida ho ateru rai kontroladu ba liseiru iha Tibar, no Ótel Hilton Dili Palm Springs iha kuartu atus ida resin.
“Projetu rua ne’e importante tebes ba Timor-Leste iha nian karakter de servisu, ateru kontroladu tibar ita hatene sei fó solusaun ba problema lixu ne’ebé ita infrenta iha tibar, ita hasoru problema barak, sunu no suar sira, ne’ebé fó impaktu ba populasaun sira nia ne’ebé,” dehan SEA Deomtro Amaral ba jornalista iha Salaun Esperansa Delta, segunda, (05/07/2021).
Nia hatutan, presenza husi komisaun rua ne’e importante ba Timor-Leste atu bele servisu lalais ho kualidade atu hametin autoridade iha nia sevisu ne’ebé diak liu.
“Ita presiza duni halo jestaun ba lixu ne’ebé di’ak liu, projetu ateru kontroladu ne’e sei mellora liseiru iha tibar hamutuk hektares 15 atu bele iha kapasidade fó jestaun ba lixu ba tempu naruk, no mos ba Ótel Hilton ita hatene bele ajuda indikador infraestrutura iha Timor-Leste, iha area Turismu no ajuda kapasidade Timor-Leste nian bele realiza hostin konferensia internasional sira,” hatete nia.
Iha sorin seluk Diretora Ajensia planeamentu Munisípiu Dili, Emiliana Soares, hatutan, futuru sei halo jestaun ne’ebé diak atu nune’e lixu Tibar labele fó impaktu ba populsaun sira.
“Futuru ha’u hanoin ita sei iha jestaun ne’ebé di’ak liután, agora ita haree ita boot sira akompaña iha ne’ebá ahi-susar barak inpaktu ba ita-nia komunidade sira ne’ebé hela besik iha área Tibar,” nia esplika.
Nia hatete, Ótel Hilton ne’e iha oportunidade barak iha futuru tanba bele uza ba konferensia internasional presija fatin ne’ebé boot.
“Tanba ne’e mak ha’u hanoin Ótel Hilton ne’e nia fó tebes benefisiu ba ita hotu nune’e ita nia parseiru sira mai investe karik sira hatene Dili mós sai fatin di’ak atu hela ho estandar nasionál nian,” tuir nia.
Entretantu projetu ne’e rasik ho tipu ICB (Internasionál Competition Building) atu kaer projetu ne’e sei loke konkursu ba kompañia Ineternasional no Lokal sira.
Jornalista : Rita Moniz
Asisten Editór : Pedro de Alemeida
