Lafaek News—Padre Juvito do Rego konsidera, Diretor Assosiasaun HAK, ativista Sisto dos Santos, nu’udar símbolu ema ki’ik sira nian hein katak ema ki’ik sira nia laran moras sira ne’e sa’e ba maromak hodi hasoru aman lalehan nia pesoas estraordinária.

“Matebian Sisto símbolu ema ki’ik sira nian, ha’u hein katak ema ki’ik sira nia laran moras sira ne’e sa’e ba Maromak hodi hasoru aman lalehan, nia pesoa estraordinária,” dehan Padre Selebrante Juvito do Rego ba jornalista hafoin remata misa ba Matebian Diretor Assosiasaun HAK Sisto dos Santos iha Igreja parókia  São José, Aimutin Sabado ( 18/03/2023).

Amu Juvito haktuir, Sisto nia ativismu ida ne’e fó laran mós la iha intesaun atu hatun ema, maibé hahalok at sira nia brani hamrik iha oin atu funu hasoru, ida ne’e mak Sisto husik hela ba Timor oan sira liu-liu ba foinsa’e sira, atu hamrik hasoru buat at, ho korajen hanesan Sisto ninia ho espíritu krítiku.

“Espíritu ida ne’ebé la buka an rasik, buka ema barak komunidade sira, ida ne’e Sisto nia ain fatin ne’ebé nia husik hela iha rai ida ne’e, povu ida ne’e, ema barak senti lakon tebetebes Sisto nia prezensa, espíritu ninian ne’e inspira ema, atu ema bele brani halo hahalok di’ak, nia nunka hanoin halo hahalok at, hasoru ema ida atu hatun ema ida laiha, nia ko’alia ho di’ak, ema haree nia fuk sabraut, oin ne’e hanesan saida maibé nia ema ne’ebé di’ak tebe-tebes, ba ha’u laran di’ak ne’e mak importante tebetebes,” padre Juvita afirma.

Sisto ema ne’ebé ko’alia ho kalma, kuarensia, ho neon ho laran halo buat hotu-hotu  sempre ba ema hotu  nia di’ak nunka halo ba nia an, nia la buka halo ba nia an, rai Timor presiza ema sira ne’ebé fó an, nia ema ne’ebé fó nia an ba ema hotu.

“Sisto ema ida ne’ebé mak bele dehan subtitutu Sisto laiha, laiha ema ida mak substitui Sisto, maneira ida krítiku, krítiku tebes halo buat hotu-hotu la buka oin, defende ema ki’ik sira, kbi’it laek sira, aileba sira, haree ema ne’ebé marzenizadu sira, Sisto ema ida ne’ebé mate ho nia ideal bo’ot tebetebes justisa ho lian loos.

Entretantu tuir Padre Juvito, foinsa’e sira la presiza moris tuir Sisto, Sisto mesak de’it, Sisto laiha ema ida mak substitui nian, maibé katak espíritu ne’ebé Sisto husik hela, korajen ne’ebé Sisto husik hela, determinasaun ne’ebé Sisto iha hirak ne’e bele sai hanesan motivu ne’ebé motiva joven hotu-hotu atu banati tuir atu funu hasoru buat at, Timor ne’e buat at barak, la tauk la ho korajen ne’ebé eroízmu.

“Timor presiza eroi hanesan Sisto sira ne’e, la’ós eroí ida ne’ebé kaer kilat tiru inimigu maibé funu hasoru inimigu pobreza, ignoransia, injustisa, falsidade, hasoru lian bosok, maibé ho determinasaun ne’e mak Sisto nia ain fatin ida ne’e presiza joven lao tuir,” nia dehan.

Jornalista : Rita Moniz

Editór       : Agapito de Deus